Urtero legez 21 eta 11 kilometroko ibilbide banatan lehiatuko dira, Santutegitik hasita.
Domekan Urkiolako XXII. Maratoi Erdia jokatuko dute Santutegi paretik hasita. Aurreko aldietan legez, ibilbide bi prestatu dituzte: 21 eta 11 kilometroko bana. Ibilbide luzeagoa 10:00etan hasiko da eta laburragoa 10:15ean.
Baso bideetatik zehar ibilbide gorabeheratsua prestatu dute, gorantz 502 metroko desnibel positiboa duena. Iazko aldian, Oier Ariznabarreta durangarra eta Iraia Garcia amorebieta-etxanoarra izan ziren ibilbide luzeagoko irabazleak.
Sariei dagokionez, 21 kilometrokoa irabazten duenak 200 euro jasoko ditu; bigarren ailegatzen denak 150 euro, eta hirugarrenak 75 euro.
Bidezabal atletismo taldeko antolatzaileek jakinarazi dutenez, Internet bidez izena emateko arazo informatikoak egon dira asteon. Horregatik, egunean bertako izen-ematea merketu egin dute. 30 euro beharrean, 20 euro izango da.