Memoriaren Plaza Zornotzara heldu da, "bakearen eta elkarbizitzaren alde hazi bat ereiteko"

Markel Onaindia 2018ko ira. 21a, 12:34

Gogora institutuak Durangon eta Euskal Herriko beste hainbat herritan egin lez, Zornotzara ere eraman du Memoriaren Plaza. Astelehenean egingo dute inaugurazioa, 18:00etan, udaletxeko plazan. Andoni Agirrebeitia alkateak karpatik pasatzeko deia egin die zornotzarrei. "Memoriaren Plaza aukera bikaina da memoria plurala eraikitzeko". 

ETAren, GALen, BVEren, poliziaren eta Frankismoaren biktimen testigantzak proiektatuko dituzte karpan, indarkeria mota bakoitzari espazio bat eskainita. Aintzane Ezenarro Gogora institutuko zuzendariak nabarmendu du testigantza eman duten biktima horiek "paper aktibo" bat hartu dutela bizikidetzaren alde, eta bere ustez euskal gizarteak hori eskertu egin behar duela. "Gehienek bat egiten dute indarkeriaren aurkako mezuan, baina gorrotoaren aurkakoan ere bai. Bakearen eta elkarbizitzaren aldeko hazi bat ereiten ari dira". 

Astebetez egongo da Memoriaren Plaza Zornotzan. Bertatik 500 ikasle igaroko direla azaldu du Ezenarrok, ikastetxeetatik bideratuta, 4. DBHkoak eta batxilergokoak. Orain arte, Euskal Herrian 40.000 pertsona jaso dituzte ekimenean.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!