Frankismoaren ostean erakunde demokratikoak ezarri zirenetik Zornotzako Udaleko idazkari jardun du. 38 urte eman ditu zeregin horretan eta jubilatu egin da 67 urterekin.
Berba batzuk esan ditu Virtok. Hasi zenetik hona Zornotza udalerriak izan duen garapena gogoratu du eta bere lankideei esker ona adieraztean emozionatu egin da. “Nire alabaren atzetik, harroen sentiarazten nauena Zornotzako garapenean lagundu izan da. Zornotza neure herri moduan sentitzen dut”, adierazi du.
Andoni Agirrebeitia alkateak “eskerrak” eman dizkio “denen izenean”. “Zornotzan ez duzu lan bakarrik egin, Zornotzako parte ere bazara eta izango zara. Zornotzak ez zaitu ahaztuko”, gehitu du. Udalbatzarreko zinegotzi guztien txaloen artean amaitu da udalbatzarra eta udaleko intsignia jarri diote.
Zinegotzi eta lankideekin familia argazkia atera du. Azpian: Tere Virto, erdian bere azken udalbatzarra gidatzen.
