Zornotzan premia duten familiei laguntzen zien Acción Social Amorebieta (ASA) elkartea desagertu egin da. Bost kideren artean kudeatzen zuten, eta taldeko beharrizanei erantzuteko “denbora falta” izan da euren ibilbidea amaitutzat emateko arrazoietako bat, ASAko kideen esanetan. Horrez gainera, azken aldian, Etxe Gorrian zuten euren lokalean birritan lapurtu dute, eta lapurreta bakoitzean ordenagailu bat ostu diete.
ASA 2014ko apirilean sortu zuten. Harrezkero, Zornotzan beharrizana zuten familientzat elikagaiak batzen eta banatzen jardun dute. Une batzuetan, 80 bat familiari laguntzen aritu izan dira.
Bizkaiko Elikagaien Bankuan jasotzen zituzten elikagai batzuk, baina herritarrei bideratutako kanpaina propioak ere egin izan dituzte urte bi eta erdian.