Zapatu honetan, Txakolin Egunaren laugarren aldia antolatuko du Luis Urrengoetxea tabernarien elkarteak. Kale horretako 13 tabernetan garatuko dute ekimena: Tomasa, Pozus, Antxeta, Urtza, Hitzak, Larrea Bi, Belatxikieta, Auzoka, Leku Berri, Guria, Far-far, Vintage eta Harrison tabernetan. Edateko kopa erosten duenak –2 euro balioko du– euro batean dastatu ahal izango du Gorka Izagirre txakolina egun osoan zehar.
Eguraldiak ahalbidetzen badu, eguerdian txosna bat jarriko dute Euskal Herria enparantzan jan-edanagaz (taloak, esaterako). Musika ere jarriko dute. Iluntzean ere ez da jairik faltako, eta Mendaroko Motxaila Band elektrotxarangaren musikak berotuko du kaleko giroa.