Batutako diruaren zati bat Mongoliako gazte biri laguntzeko erabiliko dute. Beste zatia Stop San Filippo fundazioari emango diote.
Bederatzi musikariren abestiak entzun ahalko dira. Horietako bat galiziarra da (Kiko Raimundez) eta gainerakoak Durangaldean bizi dira: Alex García, Usue Martínez, Idoia Bediaga, Jon Montero, Martzel Vargas, Maider Legarreta, Pedro Lanus eta Jugatx Astorkia. Sarrerak 7,5 euro balio du.
Mongolian hainbat proiektu ditu La Otra Miradak. Batutako dirua, batez ere, kristalezko hezurrak izenez ezagutzen den osteogenesi inperfektua gaixotasuna duten Mongoliako haur biri laguntzera bideratuko dute. La Otra Miradako Susana Lorenzoren esanetan, ezagutu zituztenean, “etxetik sekula irten barik” zeuden.
Harrezkero, janaria eta D bitamina ordaintzen dizkie gobernuz kanpoko erakundeak. Horren ondorioz, iaz eskolara joatea lortu zuten. Ebakuntza bat dago umeen bizitza kalitatea hobetu ahal izateko, eta ahaleginetan dabiltza hori gauzatu ahal izateko. Era berean, eraikin zahar bat eguneko zentro bihurtu gura dute urritasunen bat dutenentzat.