Zornozaren 60. urteurrena ospatzen dihardute aurten. Sorreratik, elkarteak hainbat ekimen bultzatu ditu kultur arloan. Sei hamarkadako ibilbidean taldea unean uneko beharrizanetara egokitu dela gogoratu du Fernandezek. “Dantza talde bat izan genuen, eta euskara ikastaroak, antzerki taldea eta txistulari taldea antolatu izan ditugu. Momentu honetan badago dantza talde bat, euskaltegiak ere badaude, baina bere garaian, horrelakorik ez zegoenean, hutsune hori bete genuen”.
Urteurren ospakizunen barruan, ekainaren 8an, Bizkaiko abesbatzen jaialdia antolatu zuten Zornotzan. Izan ere, elkartearen ardatza abesbatza da. Egun, hogei abeslarik dihardute Mireia Izagirrek zuzentzen duen taldean. Elkartean 160 bazkide dituzten arren, abesbatzako kide izateko ez da zertan elkarteko bazkide izan.
Urteurren ekitaldiekin jarraituko dute uda ostean ere. Santa Zezilia egunaren inguruan ere urteurren ekitaldiren bat prestatzekoa asmoa dute.
Ekintza ugari
Enrike Renteria kaleko margo lehiaketa ere Zornozak antolatzen du. Horrekin batera, balkoietan margoak eskegitzeko olanak ere jartzen dituzte. Gainera, gazteen artean irakurzaletasuna bultzatu guran, ipuin lehiaketa antolatzen dihardute hamalau urtez herriko ikastetxeekin batera.