2014ko Enplegurako Plan Integralean enplegua sustatzeko aurreikusitako neurrietako bat da. Zornotzako Udalak langabezian dagoen pertsona bat kontratatzearren edo aldi baterako kontatuak mugagabe izatera pasatzearren enpresek diru-laguntza jasoko dute. Enpresek edo bazterketa jasateko arriskua duten pertsonak lan munduan integratzeko helburua duten irabazi asmorik gabeko elkarteek laguntza hau jaso ahal izango dute. Kontratatutako pertsonak Zornotzan erroldatuta egon beharko dira gutxienez bost urtean jarraian edo aldika 15 urtean. Kontratuak 2014 urtean egin beharko dira eta gutxienez hiru hilabeteko iraupena izan beharko dute.
Diru-laguntza Gizarte Segurantzako gastuak ordaintzera bideratuko dutela azaldu dute Zornotzako Udaleko arduradunek. Gehienez 4.000 euro jaso ahal izango dituzte langabezian dagoen pertsona bat kontratatzearren edo lanaldia handitzearren. 5.000 eurora arteko laguntza jaso ahal izango dute langabetuak diru-sarrerak bermatzeko legearen arabera erregulatutako laguntza jasotzen badu. Eskaerak abenduaren 15era arte aurkeztu daitezke Nafarroa Zentroko lehenengo solairuan, astelehenetik ostiralera, 08:30etik 14:30era. (94 6300190 / sustapena@amorebieta.net)