LAB sindikatuak Zaldibarko Mecanizados Mecar enpresaren jarrera salatu du publikoki, "langileen aurkako indarkeria" darabilelakoan. Sindikatuak dioenez, "enpresa langileak itotzen dabil ekoizpen eskakizun altuekin". Eta ekoizpen horiek lortzeko moduen artean, "hitzezko presio-metodoak", "metodo fisikoak", "kronometroak" eta "bestelako jardunbide ez-ortodoxoak" zerrendatu dituzte.
Lan-giro horren ondorioz, langile batek "antsietate krisi larria" jasan duela, eta "enpresak ez ziola arretarik eskaini ere egin" kritikatu du sindikatuak: "Enpresak uko egin zion mutualitatearentzat partea egiteari eta, ondorioz, langileak mediku-arreta jasotzea eragotzi zuen", salatu dute. LABek langileen osasuna "lehenestea" eskatu dio enpresari.
Mecanizados Mecar Zaldibarko industrialdean dago, Euskal Herria etorbidearen amaieran. LABen datuen arabera, lantegiak 20 behargin ditu.