Emakumezkoen futbolaren aldeko urratsak Zaldibartik

Emakumezkoen futbolak inoizko marka guztiak hautsi ditu 2018/2019 denboraldi honetan. San Mamesen 48.121 zale bildu ziren urtarrilean, adibidez, emakumezkoen lehen taldeak Kopako final-laurdenetan jokatutako kanporaketan.

Oraindik berdintasunetik urruti egon arren, hainbat emakumek urteak daramatzate norabide horretan lanean. Baita Durangaldean ere, noski. 1998tik 2002ra emakumezkoen senior taldea eduki zuen Zalduak. Marimar Casaseca Martin taldeko kapitainaren gidaritzapean, lau denboraldi egin zituen taldeak, 2002an desagertu zen arte. 2017an, ostera, haur-kategorian taldea sortuta, Zaldibarren urrats sendoa eman zuten emakumezkoen futbola berreskuratzeko. Gerora, Elorriogaz batu dituzte indarrak.

Argazki hau Solobarria futbol zelaiaren sarreran dago, Ilargi argazki taldekoen lanari esker.