Hainbat herritarrek erantzun zioten eratu berri den Gure Esku Dago taldearen deialdiari. Izan ere, Zaldibarko askotariko elkarteak eta udalean ordezkaritza daukaten alderdi politiko guztiak gonbidatu zituzten barikuko aurkezpenera. Ekitaldi “xume eta herrikoia” izan zela azaldu dute antolatzaileek, baina bertaratu zen jendeak ilusio handia agertu zuela ere aipatu dute.
Erabakitzeko eskubidearen alde lan egiteko, zaldibartar talde anitza batu da Gure Esku Dago dinamikara, eta ekarpenak egiteko prest dauden herritar guztiei dei egin diete eurekin bat egiteko. Herrian zehar kartel bidez zein sare sozialetan iragarriko dituzten herri batzarretara gerturatzeko gonbidapena zabaldu diete herrikideei.