“Nork ematen dio bizia herriari? Oinezkoak, kalean dabilenak. Eurentzat herri seguru eta eroso bat bilatzea da planaren ideia nagusia”, azaldu du Arantza Baigorri alkateak. Hiri Antolamendurako Plan Orokorra diseinatzerako prozesuan herritarrengandik jasotako iritziei jarraituz idatzi dute Irisgarritasun Plana.
Horrela, Santa Isabel kalea eta Euskalerria kaleko zati bat oinezkoentzat berrantolatzea aurreikusten dute planean. Beste kale batzuk erdi oinezkotu egingo lituzkete.
Aldaketa horiek herri barruko trafikoa berrantolatzea eskatuko lukete. “Autoek herrira sartzeko edo handik irteteko ibilbide bat izan behar dute, baina bikoak barik norabide batekoak izan daitezke. Horrela, oinezkoentzat espazioa irabaziko litzateke”, azaldu du Baigorrik.