Ekainaren 9, 10 eta 11rako sei kontzertu antolatu dituzte Gari Rock jaialdiaren barruan, Zaldibarren. Aurreko edizioetan bezala, “gure ahalmenen barruan ahalik eta kalitaterik handieneko musika jaialdia eskaintzea” izan dute erronka, Iban Berasaluze Gari Rock elkarteko kidearen berbetan. “Euskal Herriko mailarik goreneko rock taldeak ekartzea” lortu dute aurten ere.
Zapatuan, ekainaren 11n joko duen Highlights da aurtengo kartelburua. “Energiaz beteriko rocka egiten dute, 70eko hamarkadako estiloko rocka egiten dute, oso ondo landutakoa”, azpimarratu du Berasaluzek. Egun horretan joko du, baita, azken aldian kontzerturik eskaini barik egon den The Riff Truckers taldeak ere. Lehenago ere gonbidatu izan dituzte gernikarrak Zaldibarrera, eta ekainaren 11ko egun osoko plana borobilduko dute euren emanaldiagaz, oraingoan.
Ekainaren 10a izango da Gari Rock jaialdiko Durangaldeko musikaren gaua. Yoko Out durangarrak eta Han elorriarrak arituko dira egun horretan, Zaldibarko Gaztetxean.
Doakoak edo hiru euroko sarrera duten emanaldiak izango dira guztiak. “Izan ere, gure helburua ez da etekin ekonomikoa ateratzea, ahalik eta musikazale gehien erakartzea baizik”, Berasaluzek azaldu duenez.
Egitaraua:
· Ekainaren 9an, 20:00etan, Moonshine Wagon,Castet Elkartean
· Ekainaren 10ean, 22:00etan, Yoko Out + Han, Gaztetxean
· Ekainaren 11n, 14:30ean, Herri bazkaria, Gaztetxean
16:30ean, The Reverendos, Gaztetxean
23:00etan, Highlights + The Riff Truckers, Gaztetxean