Herriguneko industriagunerako trafiko astunaren joan-etorriak eragotzi, eta saihesbidearen proiektua amaitzeko lanei ekingo diete astelehenean, Askorra eta Foru kaleetan. Euskal Herria kaletik barik, ibilgailu astunak kale bi horietatik bideratu ahal izateko, kamioiek bira egin dezaten ahalbidetzeko bidea zabaldu, eta espaloia estutuko dute. Gainera, oinezkoentzako guneak eta aparkalekuak ere berrantolatu egingo dituzte.
Urre SA enpresak egingo ditu lanak, eta Zaldibarko Udalak 194.000 euro bideratuko ditu proiektua garatzera. Aurreikuspenen arabera, zortzi hilabete iraungo dute lanek.
Obra amaitzen dutenean, zaldibartarrek onura nabarmena igarriko dutela dio Arantza Baigorri alkateak, “ibilgailu astun, handi eta zaratatsuek ez dutelako herria zeharkatuko”.
Duela urte batzuk saihesbidea amaitzeko planteatutako proiektuak milioi bat eta erdi euroko kostua zuen, baina “teknikoki eta ekonomikoki” ez zen bideragarria, eta, alkatearen berbetan, horregatik heldu diote alternatiba honi.