Eskopeten fabrikazioan eta salmentan jardun duten Lanber eta Colanber enpresen egoeraren berri ematen duen idatzia aurkeztu zuten martitzeneko udalbatzarrean LAB eta CCOO sindikatuek.
Hartzekodunen lehiaketan daude talde bereko enpresa horiek, eta lantoki bietako 15 lanpostuen galera ekarriko duen likidazio prozesuan sartuta.
Langileek martitzenean Zaldibarko udalbatzarrean aurkeztu zuten idatzian azaltzen dutenez, “enpresa hauen desagertzea ez da bideragarritasun ekonomiko ezagatik gertatuko, arduradunen kudeaketa negargarriak ekarri gaitu gauden irteerarik bako kalezulo honetara”. Hainbat hilabeteko soldata zor diete, udalbatzarrean irakurritako idatzi horretan azaltzen denez, Lanber eta Colanber enpresek langileei. Egoerak kaltetutako langileei elkartasuna adierazi zieten udaleko alderdiek.