“Inbertsio beharrezkoenak lehenentsiz”, udal aurrekontuko hainbat partida aldatu dituzte.
Martxoan 2012rako udal aurrekontuak onartu zituztenean markatutako hainbat diru atal aldatzea proposatu zuen, egueneko ez-ohiko udalbatzarrean, Bilduko udal gobernuak. Kreditu aldaketa horiek egitearen alde bozkatu zuten Bilduko zinegotziek, eta abstenitu egin ziren EAJ, PSE eta PP alderdietako ordezkariak.
Udal aurrekontuko hogeita hamarretik gora diru partidatan egin dituzte aldaketak. Esaterako, urte hasieran 80 urtetik gorakoen etxebizitzetan ke detektagailuak ipintzera bideraturiko diru-atala jubilatuen etxean hobekuntza lanak egiteko erabiltzea erabaki dute. Arantza Baigorri alkateak azaldu duenez, lehentasunak berdefinitu dituzte, eta hasiera batean lan horietara bideraturikodiru-atalari 9.000 euro gehitu dizkiete: “Dirua jubilatuen etxean gastatzea hobetsi dugu, konponketak behar ditu-eta”.