XIV. Neguko Azoka burutuko dute domekan, erakusketa, salerosketa eta lehiaketa uztartuz.
Goizeko 11:00etan zabalduko dute domekan Zaldibarko XIV. Neguko Azoka. Euskal Herria etorbidea jai-gune dela, nekazarien uzta izango da eguneko protagonista. Durangaldea, Busturialdea, Lea-Artibai, Debabarrena eta Debagoieneko ekoizleak etorriko dira produktuak eskaintzera, antolatzaileek azaldu dutenez.
Sariak banatuko dituztenez, 10:00etan epaimahaiko kideek aztertuko dituzte postuak, eta horren ondoren, 11:00etan, zabalduko dute azoka jendearentzat. Baserriko produktuak –barazkiak, frutak eta okelaz egindakoak–, mintegietako landareak, txakolina, eztia, gazta, ogia eta gozogintza ipiniko dituzte interesdunen eskura, ikusgai zein salgai. Sariei dagokienez, 14:00etan esango dute nortzuk diren irabazleak.
Eguerdiko 15:30 arte egongo da erosketak egiteko aukera, ordu horretan emango diote-eta azokari amaiera.