Uztailaren 22an izan ziren gertaera latz haiek, herrian Santamaña jaiak ospatzen zebiltzala. Bonbardaketan hildakoak gogoratzeko, aurten modu berezia izan dute Otxandion, 9:30ean, Vicinay-ko adarra eta su kanpaiak jo dituzte. Arratsalderako Kanpaien oroimena, herriaren arnasa ekitaldia prestatu dute; Andikona plazan izango da. Lore eskaintza eta karrilloi eta kanpai kontzertu parte hartzailea egingo dituzte, jai batzordeak azaldu duenez. Emakumeen soka-dantzak eta Ane Gebarak sorturiko Haritik tiraka antzezlanak borobilduko dute eguna.
Bestalde ohitura den bezala, domekan, uztailak 26, bonbardaketan hildakoei omenaldia egingo diote Andikona plazan. Plaza hau izan zen bonbardaketaren epizentro.