Otxandioko Aurrera Begira elkarteak bultzatutako ekimena izan da film dokumentala ekoiztea. Luzia Urigoitia 'Lutxi' 1987an hil zuten, 28 urte zituela, Guardia Zibilak ETAren Donostia komandoa desegiteko antolatutako operazioan. Gazte otxandiarra Pasaiako Trintxerpe auzoko (Gipuzkoa) etxebizitza batean zegoen, beste kide batzuekin.
Dokumentalaren narrazioa Urigoitiaren familiaren akusazio partikularraren inguruan antolatuta dago nagusiki, Iñigo Iruin abokatuaren inguruan. Halaber, kasuan zuzenean parte hartu zuen Paco Etxebarria forentsearen testigantza jasotzen du filmak, eta Maider F. Galardi kazetariaren ahotsa ere bai, "hark urte batzuk geroago kasua berriro aztertu baitzuen, memoria politikoaren eta euskal gatazkaren kontakizunaren inguruko eztabaidari erakarria", sinopsian azaldu duten moduan. Gaineratu dutenez, "ez du soilik Urigoitiaren heriotzaren auzi juridikoa aztertzen, baizik eta euskal historia garaikidearen zenbait pasarte kontatzeko zailtasunetan ere sakontzen du, non memoria alderdien interesek zipriztinduta baitagoen".