Otxandion Plaza Nagusiaren inguruan garatu dira herriko elementu arkitektonikorik garrantzitsuenak. Esaterako, herriko udaletxea eraikuntza barrokoaren adibide ezin hobea da, Bizkaian garrantzitsuenetariko bat. Eta parez pare dagoen frontoia 1857an eraiki zuen Kristobal Bernaola arkitekto arratiarrak. Pasealekua eta Bolatokia ere aipagarriak dira, eta, horregaz lotuta, 1861eko harrizko zutabe segida. Vulcanoren harrizko irudiak osatzen du Otxandioko herriguneak batzen duen aberastasun arkitektonikoa.
Elementu eta eraikuntza horiek gehiago ezagutzeko, zapatuan ekitaldia egingo dute Europako Ondare Jardunaldien barruan, udalak Gerediaga elkartearen laguntzagaz antolatuta. Ibilbide gidatua 11:00etan hasiko da, Plaza Nagusian bertan. Lekua mugatua denez, aurretiaz izena eman behar da. Horretarako, 94 681 80 66 telefono zenbakira deitu daiteke, edo ejardunaldiak@gmail.com helbide elektronikora idatzi.