Bagaizan talde feministak, Mirugain mendi taldeak, Pasealeku elkarteak eta udalak, hainbat ekitaldi antolatu dituzte, zapatuan ospatuko den Emakumeen Nazioarteko Egunaren bueltan. Martxoaren 8a aldarrikapenerako eguna izango dute. Hartara, horma-irudi herrikoia egitera deitu dituzte herritarrak, 12:00etan, plazan. Kontzentrazioa ere egingo da, 13:00ean. Arratsaldean, Bilbon, Faxismoaren kontra, ausardia eta aliantza feministak lelopean Bilbon egingo den manifestaziora batuko dira.
Otxandioko emakume nagusiei omenaldia egingo die Pasealeku jubilatu elkarteak zapatuan, 13:30ean. Ondoren, luntxa egingo dute, hurbiltzen diren guztientzat. Arratsaldean karta-joku txapelketa egingo dute, 17:00etan hasita.
Azoka eta dokumentala
Domekarako, bestalde, emakume ekoizle eta sortzaileen azoka antolatu dute Otxandion. Plazan batuko dira erakustokiak, 11:00etatik 14:30ak bitartean. Gainera, erosketa egiten duten herritarrek tokiko produktu-sorta baten zozketan parte hartuko dute. Arratsaldean, bestalde, Quelccaya Qoi Ilur Puñuna dokumentala ikusteko aukera egongo da. Kultur etxean izango da emanaldia, 17:30ean.