EH Bilduren Mahai Politikoak Pello Otxandiano Kanpo (Otxandio, 1983) proposatu du 2024ko hauteskundeetan lehendakarigai izateko, koalizioak jakinarazi duenez. Otxandianok "jakintza, solbentzia, ziurtasuna, konpromisoa, arima eta pasioa" ematen dizkio hautagaitzari, Arnaldo Otegik gaur goizeko agerraldian adierazi duenez. Orain, astelehenean hasiko den prozesuan, bilkideek hautagaitza berretsi beharko dute.
Otxandiano telekomunikazio ingeniaritzan doktorea da eta bi alaben aita. Bere sorterriko zinegotzi izandakoa da lau urtez (2011tik 2015era) eta Sorturen birfundazio prozesuko kide ere izan zen. Gaur egun EH Bilduko programa zuzendaria da.