Euskararen normalizazioaren aurka doazen epaiak kritikatu ditu Otxandioko Udalak. Epaiek "euskararen ofizialtasuna bera ere zalantzan" jartzen dutela uste dute. Beraz, epai hauek euskararen biziberritzearen "aurkakoak ez ezik adostasun sozial handi baten kontrakoak" ere badirela adierazi dute.
Egoera horren aurrean adierazpen instituzionala onartu dute udalbatzarra osatzen duten alderdiek. Bertan "kezka eta larritasuna" adierazi eta sententziak "oztopoak besterik ez dakartzala" salatu dute. "Sententzia horiek bereziki eragiten digute udalerri euskaldunei, horietan ari baikara hartzen euskaraz funtzionatzeko neurri gehien", gehitu dute. Udalak dei egin die lege-araudia garatzeko eskumena duten gainerako erakunde guztiei "euskararen indarberritze-prozesua lege-babes sendoarekin hornitzeko".
Azkenik, Euskalgintzaren Kontseiluak azaroaren 4an Bilbon antolatutako manifestazioan parte hartzeko deia egiten die herritarrei.