Gabon zahar egunean joango dira bertara. Autobus geltokian elkartuko dira, 09:30ean. Arangion, ohiko buzoi bat barik metalezko txondor bat dago, bere sasoian otxandiar batek egindakoa. Han inguruan batu eta Mirugainen aurtengo egutegia erre eta berria banatuko dute. Ondoren, 'Agur, urtezahar' abestia kantatuko dute. Otxandioko kanta bat da. Emilio Donadok liburu batean batu zituen Otxandioko, Legutioko eta Ubideko kantak, eta han jasota dago abesti hori.
Ondoren, xanpaina eta turroia egongo da bertaratzen direnentzat, eta guraso elkarteak ogitartekoak banatuko ditu. Mirugainek ekintza asko antolatu du urtean zehar: erakusketak, bazkari herrikoia… Horrez gainera, jaietako txupinazoa bota zuten Oihandi abesbatzagaz batera. "Oso pozik gaude, gura genuen moduan irten du denak. Gainera, jende berria gogotsu eta gauzak egiteko irrikagaz sartu da", adierazi du Mirugaineko Tomas Agirrek.