Jaien ordez, uztail osoa iraungo duen kultur eskaintza antolatu dute Otxandion

Uztailaren 30ean Puro Relajo taldeak kontzertua eskainiko du.

Aurten ez da santamaña jairik egongo Otxandion. Udalak bat egin du jai batzordeak harturiko erabaki horregaz. Oraindino ez dute jaiak normaltasunez antolatzeko aukerarik ikusten, herritarrei bidalitako informazio orrian azaldu dutenez. Horren ordez, udalak Biziguraz betie izeneko ekitaldi sorta antolatu du. Ekitaldiak uztaileko egun askotan banatuta egongo dira.

Uztailaren 17a umeei eskainitako eguna izango da eta askotariko jokoak egingo dituzte plazan eta Mainondon. Hurrengo egunetarako, Urduri dantza taldearen saioa, hilaren 18an, eta Kale Gorrian izeneko kale antzerkia, uztailaren 19an, nabarmendu daitezke.

Uztailaren 25ean hainbat ekimen egongo da. Eguerdian, 1936ko bonbardaketan hildakoak gogoratuko dituzte. Segidan, udal bandak eta Arabako bandak musika kontzertua eskainiko dute eta, arratsaldean, Iñaki Palacios & The Gael's taldeak doinu irlandarrak eta euskaldunak uztartzen dituen Baltik lan berria aurkeztuko dute.

Azkenik, Puro Relajo taldeak kontzertua eskainiko du uztailaren 30ean, 20;00etan.

EGITARAUA

• Uztailak 2, 22:00etan Temblores - zinema (Andikonan)

• Uztailak 9, 22:00etan Urtzen - zinema (Andikonan)

• Uztailak 16, 21:30ean Lur eta Amets - zinema (Andikonan)

• Uztailak 17, Txiki-gazte eguna (Plazan, 0-9 urte) (Mainondon, 10 urtetik aurrera)

• Uztailak 18, 19:30ean Urduri dantza taldea (Plazan)

• Uztailak 19, 19:00etan Kale gorrian - antzerkia (Plazan)

• Uztailak 22, 19:30ean Sokadantza (Plazan)

• Uztailak 23, 22:00etan Jainkoak ez dit bakartzen - zinema (Andikonan)

• Uztailak 25, 13:30ean Andikonako omenaldia (85. urteurrena)
Jarraian Limonada + Musika kontzertua udal banda eta Araiako bandaren eskutik
19:00etan Iñaki Palacios & The Gael´s (Plazan)

• Uztailak 30, 20:00etan Puro Relajo 

• Uztailaren 16tik 18ra, Argazki erakusketa Santa Maña jaiak

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.