"Bagenuen susmoa, baina ez genuen uste hain azkar aurkituko genuenik", adierazi du Anbientalia 21eko Sergio Gallego kideak.
Europako hainbat zonaldetan "nahikotxo" aurkitu daitekeen espeziea da, baina Iberiar Penintsulan ez hainbeste. "Urduñatik behera ez dago baso-igel jauzkariaren konstantziarik. Urduñan eta Gorbeia inguruan aurkitu da. Eta orain badakigu Otxandion ere badaudena", azaldu du Gallegok.
Inguru horretan urmael gehiago sortu gura dute espezie horren ugalketa sustatzeko.
Uhandre alpetarra
Presazelai inguruan urmael gehiago dago eta hango askotariko espezieen artean uhandre alpetarra aurkitu dute. Babestuta dagoen espeziea da. Kasu honetan ere, lehenengoz identifikatu dute espezie horretako uhandre bat Otxandion, eta gertuko jarraipena egingo diote.
Anfibioak "ez ukitzeko" deia
Sarritan gizakia da animalien etsairik handiena, gura barik bada ere. Gallegok ohartarazi du anfibioak ukitzea arriskutsua izan daitekeela animalientzat. "Anfibioek azaletik arnasten dute eta, ukituz gero, gaixotasunak transmititu ahal dizkiegu". Anfibioak "ez ukitzea" da gomendioa, edo, gutxienez, osasun-neurriak hartzea, eskuak eta abar desinfektatuz.