[BIDEOA] "Egoera dena delakoa izanda ere, atzean utzi ezin diren" gertaerak daudelako, 1936ko bonbardaketan hildakoak gogoratu dituzte Otxandion

Aurten Otxandioko santamaña jaiak bertan behera utzi dituzten arren, jaien barruko ekitaldi esanguratsu bat mantentzea erabaki dute: 1936ko uztailaren 22ko bonbardaketan hildakoei egindako omenaldia. Gaur arratsaldean egin dute ekitaldia, Andikona plazan, bonbardaketaren 84. urteurrena betetzen den egunean. "Badaude gauza batzuk, egoera dena delakoa izanda ere, atzean utzi ezin direnak", arrazoitu zuen Egoitz Garmendia alkateak, Andikonako Foroak adostutako adierazpena irakurri duenean.

Ekitaldi xumea izan da, baina sentimenduz betea. Andikonako Foroak landutako testuaren bidez, erantzukizunak eskatu dituzte. "Bonbardaketan hildakoak non dauden jakin gura dugu. Non daude? Zelan da posible hemen gertatu zena gertatuta, inork ardurarik hartu eta barkamena eskatzera etorri ez izana?", jasotzen du testuak. Horren aurrean, konpromiso bat hartu dute. "Hitza ematen dugu, hemen, Andikonan, hildakoak non dauden jakiteko orain arte egindako lanak bururaino eramango ditugula".

Testuak gaur egungo egoerari ere egiten zion erreferentzia. "Koronabirusak bizitza asko utzi ditu bidean azken hilabeteetan, Euskal Herrian eta munduan, eta eurak zein euren familiak gogoan eduki gura ditugu gaurkoan ere", azaldu dute.

Azkenik, Otxandioko herritarrek "txarrenetik onena" ateratzeko duten gaitasuna azpimarratu eta batasunerako dei bategaz amaitu dute ekitaldia. "Andikonak batzen gaituen eran batu gaitzala etorkizuneko Otxandiok ere".

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.