Irailaren 25ean eta 26ean izango dira Josu Zabalaren eta Gariren 'Inun baino alaiagoa izanen da' emanaldiak

Andoni Aldekoa, Josu Zabala, Lorea Bilbao eta Gari.

Euskalduna Jauregiko bi emanaldietarako sarrera agortu dira. Hertzainaken sei diskoetako abestiak joko dituzte, bi emanaldietan. Irailaren 25eko eta 26ko emanaldiak 20:30ean izango dira.

Hertzainak talde mitikoaren lehenengo diskoaren 35. urteurrena baliatuta, emanaldi berezia eskaintzeko aukera aprobetxatu gura izan dute Zabalak eta Garik. "Ez da Hertzainaken revival bat izango, kontzertu paregabea eskainiko dugu. Bizitzak berriro elkartu gaitu eta ospatu gura dugu" adierazi du Garik. Josu Zabala otxandiarrak, ostera, Hertzainaken ibilbideak suposatu dien esperientzia ekarri du gogora: "Hertzainaken abestiak joko ditugu, nostalgia barik, inolako penarik gabe, poz handiarekin eta bizitzarekiko maitasun sakonarekin".

Gari eta Josu Zabala Maldan Beherako taldekideekin batera taularatuko dira, eta gonbidatu bereziak egongo direla ere aurreratu dute. 

Josu Zabalagaz eta Garigaz batera Lorea Bilbao Euskara eta Kultura diputatuak eta Andoni Aldekoa Euskaldunako zuzendari nagusiak parte hartu dute aurkezpenean.