Eguerdiko trikipoteoak bertso bazkariari emango dio erreleboa. Bazkalostean, 18:00etan, gazte ginkana egingo dute, askotariko jokoekin. Ostean, elektrotxarangak berotuko du giroa herrian, eta eguna kontzertuekin amaituko dute. 23:00etan, Ezetaerre rap talde galiziarraren eta ON! rock talde ondarroarraren kontzertuak hasiko dira. Gauari DJ Maskaradunaren musikak emango dio jarraipena. Domekan kantuzalez beteko da Otxandio Kantu Eguna ospatzeko. 12:30ean hasita, kalez kale ibiliko dira kantari, 15:00ak arte. Ordu horretan, eztarriari merezitako atsedena emanez, bazkaritara batuko dira denak.
Aste barruan egongo diren ekintzen artean, txupinazoa eta horren osteko Bidez Batez taldearen erromeria nabarmendu daitezke martitzenean, eta pilota partiduak eguaztenean. Udaletxe pareko plazako frontoian emakumeen eta gizonen partidu bana egongo dira arratsaldean, 17:30ean.