.jpg)
1998ko Aitor Ajuria otxandiarrak bigarren amaitu du Zegama-Aizkorri Junior Trail mailako lasterketa. Junior mailan aritzeko aukera izan duen azken urte honetan, aurreko bi edizioetan gertatu zen bezala bigarren postuarekin konformatu behar izan da.
Hasieratik, Daniel Osanzek tarte handia zabaldu zuen igoerako tartean, minutu erditik gorako alde bat zabalduz. Bere atzetik Ajuria eta Morales zihoazen. Beherakoan Aitor Ajuriak erasoa jo eta Osanzen bila abiatu zen, bigarren postuan helmugaratuz 7 segundora. Beherako tartean "sentsazio hobeak" aurkitu zituela adierazi du lasterkari otxandiarrak.
Bestalde, aurten Euskal Herriko gazte mailako deialdian sartu da Aitor Ajuria. "Uda honetan Espainiako Kopako lasterketa batzuk eta Espainiako txapelketa lehiatzeko aukera izango dut", adierazi du Ajuriak.