Durangaldea aukeratu dute I. Artekale Eguna egiteko. Euskal Herriko kale-artistak batuko dira apirilaren 29an Otxandioko kale eta kantoietan, eta egitarau zabala aurkeztu dute, hasi goizetik eta ia iluntzeraino
Durangaldea aukeratu dute I. Artekale Eguna egiteko. Euskal Herriko kale-artistak batuko dira apirilaren 29an Otxandioko kale eta kantoietan, eta egitarau zabala aurkeztu dute, hasi goizetik eta ia iluntzeraino.
![\"\"](\"/fc_imagenes/artekalebarruan.jpg\")
Jai giroan eta lagun artean elkartzeko antolatu dute, aurten lehenengo biderrez, Artekale Eguna. Euskal Herriko 35 konpainiatako artistak Otxandion batuko dira, euren lanaz berba egin eta herritarren gozamenerako.
Datorren domekan, apirilaren 29an, “jai erraldoia” egongo da herriko kaleetan zehar,
goizean goiz hasi eta eguna ilundu aurretik: animazioa, zirku tailerra, erakusketak eta mota guztietako hamahiru ikuskizun.
|
EGITARAUA
-
10:00etan, En La Lona-ren Momentu Ridiccoli, Andikona plazan
-
11:00etan, Trapu Zaharraren kalejira eta txupinazoa, Andikona plazatik Plaza Nagusira
-
11:20etan, Gaitzerdi Teatroren Armenio, Artekaletik Plaza Nagusira
-
11:50ean, Zirkaleren A ze parea!, Plaza Nagusitik
-
12:30ean, Turukutupá taldearen Reciclonk!, Udaletxeko aterpean
-
12:30ean, Salitre Teatro-ren
On egin mon amour, Plaza Nagusitik Andikona plazara
-
13:30ean, Hortzmuga Teatroa taldearen Libertia, Plaza Nagusian
-
13:45ean, Latirili Teatroren
Sim & Sam, tabernaz taberna, Artekaletik
-
13:45ean, Oihulari Klown taldearen Pronóstico reservado, tabernaz taberna, Artekaletik
-
16:00etan, Debote Enbote taldearen Argotu, Artekaletik Plaza Nagusira
-
17:00etan, Toni La Sal taldearen Teleipuina, Andikona plazan
-
17:45ean, Sebastopoleko Tiririteroak taldearen Otxandioko Maskarada, Andikona plazatik Plaza Nagusira
-
18:45ean, Trapu Zaharra taldearen La avería, Plaza Nagusitik Artekalera eta Andikona plazara
|
Kale-arteen profesionalen Artekale elkarteak eta Otxandioko Udalak elkarregaz prestatu dute egitaraua. Bezperan, apirilaren 28an, afari berezia egingo dute elkarteko kideek, eta gonbidapena luzatu dute, gura duten otxandiar guztiak mahaiaren bueltan batzeko beraiekin batera.
Afarira doazenek, Jon Zabalen Pensamientos encontrados lana ikusteko aukera izango dute, gaztetxean. Lan horretan, “ilusionismo psikologikoa” jorratzen dela adierazi dute antolatzaileek.
Aterpean eskainiko duten ikuskizun bakarra izango da, kalean izango direlako hurrengo eguneko ikuskizun guztiak, mota guztietakoak. 10:00etan hasi eta txotxongiloak, clown-a, zirkua, kalejirak eta antzerkia, eta ikuskizun batzuk, modalitate bat baino gehiago uztartzen dituzten lanak izango dira.
Berezitasunen artean, Sebastopoleko Titiriteroak taldeak, jaialdirako bereziki sortu du Otxandioko maskarada. Andikona plazan izango da, 17:45etan hasita.
Bestalde, Gaitzerdi Teatro taldeak, “Otxandioko eguneroko paisaje urbanoa eraldatuko du” Armenio ikuskizunagaz, antolatzaileek adierazi dutenez.
Komediak tarte zabala edukiko du. Esaterako, publikoari barreak eragiten ahaleginduko da Trapu Zaharra konpainia, Avería kale antzerkiagaz. Baita Teatro Salitre taldea ere On egin mon amour obragaz.
Umeentzako bereziki
Umeei bereziki zuzendutako lanak ere izango dira Artekale Egunean. Adibidez, Teleipuina, txotxongiloak eta antzerkia uztartzen dituen lana, Toni La Sal taldearena; edota Momentu Ridiccoli, En La Lona taldearena, eguneko lehen ikuskizuna, hain zuzen ere, hainbat teknika batzen dituena: clown-a, txotxongiloak eta zirkuko teknikak.
Bestalde, kaleko artisten lana hobeto ezagutarazteko, konpainien eta jaialdien materialak ipiniko dituzte ikusgai erakusgela eta kale kantoietan.
|
![\"\"](\"/fc_imagenes/pedroartekale(1).jpg\")
“Kaleko arteen zirkuitua
sortzea dugu helburu”
Artekale elkartearen ordezkaria da
Pedro Ormazabal arratiarra.
Elkarte horren helburuez egin du berba
Zelan bururatu zitzaizuen Artekale Eguna antolatzea?
Durangon egin genuen elkartearen batzar orokor batean, erabaki genuen jendeari gure lana erakusteko jaialdi bat antolatuko genuela.
Zergatik Otxandion?
Herriko alde zaharra honelako egun bat antolatzeko oso aproposa iruditu zitzaigun. Otxandioko Udalagaz elkarlanean jardun dugu. Asmoa, hemendik aurrera ere Artekale Egun honegaz jarraitzea da, eta hurrengoan beste herri batean egitea.
Noiz eta zer helburugaz sortu zenuten Artekale elkartea?
Euskal Herriko kaleko arte eszenikoa bultzatzeko asmoagaz, 2006an sortu genuen elkartea. Jaialdiak, antzerki konpainiak, eta banatzaileak elkartu ginen sektorea bultzatzeko.
Zeintzuek osatzen duzue gaur egun Artekale elkartea?
Gaur egun, 35 konpainia, zazpi azoka edo jaialdi, eta hainbat banatzailek osatzen dugu elkartea. Urtero, Euskal Herriko konpainia guztiei eskaintzen diegu elkarteko kide bihurtzea.
Zertan egin duzue orain arte indar gehien?
Formakuntzara bideraturiko jardunaldi bi antolatzen ditugu, esaterako, urtero. Gainera, Aldundiagaz eta Jaurlaritzagaz hartu-emana dugu sektorearentzako diru-laguntzak sustatu eta kudeatzeko.
Aurrerantzean zer helburu?
Euskal Herriko kale antzerkiaren zirkuitua sortzea da epe laburreko gure helburu nagusia. Krisialdi sasoi honetan, bertoko konpainiei laguntzeko modu ona dela uste dugu.
|
