Zapatu honetan Albokan Rolla jaiaren hirugarren aldia egingo dute Mañarian. Herriko hainbat elkarte eta eragileren laguntzagaz, Kafraga elkarteak egun osoko jaia antolatu du, ekimen askokoa.
10:30ean hasiko dute eguna, kalejiran, albokarien eta trikitilarien laguntzagaz. Kalerik kale ibiliko dira jai-giroa ipintzen. 13:00etan plaza inguruan batuko dira eta herri kirol erakustaldia hasiko dute: Jon Gisasola, Ioritz Gisasola, Karmele Gisasola eta Goizeder Abendibar. Herri kirolen ondoren, mañariarrak herri bazkarian batuko dira.
Pilota eta musika
Herriko pala eta pilota partiduko finalekin ekingo diote arratsaldeari, 17:00etan. Hileetan kanporaketak jokatzen aritu dira hainbat bikoteren artean, eta zapatuan aurtengo txapeldunak erabakiko dituzte Mañariko pilotalekuan.
Musika kontzertuekin amaituko dute Albokan Rolla jaia. Kontzertuak 20:00etan hasiko dira. Aurten hiru taldek osatuko dute musika menua: Les Lullies talde frantziarrak eta Durangaldeko Reder eta Sermond's taldeek. Hirurek punk-rock eta rock doinuak eramango dituzte Mañarira. Kontzertu hauen ondoren, jai-giroak aurrera jarraituko du gau erditik aurrera, KSKA Selektorrak ipinitako musikagaz.