'Herri txiki, sari handi' deitu zitekeen Mañariko pilota eskolako aurtengo errifa, sariak benetan tentagarriak zirelako: Aitor Elordik eta Jokin Altunak jokatuko duten buruz buruko finalerako sarrera bi eta 300 euro. Bada dagoeneko jakinarazi dute irabazlea nor izan den: Joakin Goiti.
Maiatzaren 21eko ONCEko zozketaren azken lau zenbakiak (3740) hartu dira kontuan irabazlea nor den erabakitzeko. Goitik pelota eskolako arduraduna den Eusebi Bernaolaren eskutik jaso ditu sariak.