"Batzuetan gehiagok eta beste batzuetan gutxiagok parte hartu dute, baina, orokorrean, oso gustura geratu gara", azaldu du Karmele Gonzalez de Audikana Andra Mari Aisialdi eta Kultura elkarteko kideak. "Aukera ezin hobea izan da herria ezagutzeko. Aurrerantzean ere ibilaldi gehiago antolatzea posible da", azaldu du. Antolatzaileen esanetan, badago bisitatzeko leku gehiago, Mañariko minak, esate baterako.
Jon Arzubia izan da ibilaldietan azalpenak eman eta gidari lana egin duena. Mañariarrak dioenez, herriko historiari buruzko azalpenak berak eman dituen arren herrikideek auzoei buruz ezagutzen dutena partekatu dute. Beraz, ibilaldietan informazio trukea izan da.
Urriko lehenengo irteeran, Aldebarrena auzotik ibili ziren. Bigarrena azaroaren 21ean izan zen, Aldebaraieta auzotik. 2022ko urtarrilaren 9an, Arrueta auzoa ezagutu zuten. Azkeneko irteera bietan, otsailaren 20an eta martxoaren 20an, Aldegoiena auzotik ibili ziren.