Aldundiak atzera bota ditu Mañariko Udalak ibilgailuen abiadura gutxitzeko orain arte egindako proposamenak

Herrigunetik igarotzen diren ibilgailuen gehiegizko abiadura kezka iturri izan da Mañarian azken urteetan. Udal ordezkarien esanetan, herriko zebrabideetan susto bat baino gehiago gertatu izan da. Horregaitik, egoera horri irtenbidea bilatu guran dabiltza. Aurtengo aurrekontuetan 10.000 euroko diru atal bat ipini dute horretarako, eta iaz batzar bat baino gehiago egin zuten Aldundiagaz gaia aztertzeko.

Oraingoz, Aldundiagaz egindako batzarrek ez dute fruiturik eman. Aldundiak atzera bota ditu udaletik egindako proposamenak. Herriguneko errepide zati bat goratzea zen proposamenetariko bat. Udaleko proposamenak atzera bota bai, baina horren ordez ez dietela alternatibarik eskaini kexatu da Ainara Otxotorena alkatea. Orain, Aldundiaren erantzuna aztertzen dabiltza udalean, aurrera begirako pausoak zeintzuk izan daitezkeen erabakitzeko.

Izurtzakoa, gurago ez
Izurtzan ere urte askoan egon dira ibilgailuen abiadura gutxitzeko neurri eske. Azkenean, Aldundiak hainbat semaforo ipini du. Kontua da semaforoak gorri ipintzen direla sarritan, nahiz eta zebrabideetan inor egon ez. Udaletik ez dira irtenbide horren aldekoak. "Bidea inork gurutzatu behar ez badu, semaforoa gorri ipintzea ez da irtenbide egokia, gure ustez. Kontua ez da hori, ibilgailuen abiadura mantsotuko duten neurriak hartzea baino", adierazi du Otxotorenak.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.