Orain zuhaitzik bako lursaila da, baina bota aurretik pinuak, jatorri amerikarra duen Lawson espezieko zipresak eta astigar japoniarrak osatzen zuten gune hartako zuhaiztia, Lurgaia Fundazioko Jon Hidalgok azaldu duenez. Hurrengo hamarkada bietan, baso autoktonoa sortzeko lan egingo dute. "Batzuetan, profesionalak arituko dira horretan, baina gure asmoa, batez ere, herritarrekin boluntariotza lana egitea da", azaldu du.
Lursaila Mañaritik Urkiolara bidean dago. Errepidetik ez da ikusten, baina Saibigainera doan pistatik bai, alboan dagoelako. Jendearen bistara egotea positiboa dela uste du Hidalgok, han egiten den lanaren fruituak ikusteko aukera izango duelako edozeinek. Lursail horretan antzina zer zuhaitz egongo ziren galdetuta, hainbat adibide jarri du: urkia, haritza, pagoa, serbala eta gorostia, besteak beste. "Hemendik 25 bat urtera, berez hazten denagaz eta guk landatzen dugunagaz baso autoktono gazte bat egotea da helburua", azaldu du Lurgaiako kideak.
Etorkizunean lursail hori hesitzeko asmoa dute, batez ere lehenengo urteei begira, zuhaitz landareak animaliengandik babesteko.