Ordenantza berria izango da, orain arte araututa egon ez den zerbait delako. Herriko taberna batek estalpe bat ipini gura du kanpoko mahaietarako, eta horren gaineko tramiteak egin guran joan zen udaletxera. Horren harira, egoera guztiak erregularizatuko dituen ordenantza lantzea eta indarrean ipintzea erabaki du udalak.
Terrazetan mahaiak ipini ahal izateko prezioak merkeak izango dira, udal arduradunen esanetan. "Izan ere, asmoa ez da irabaziak lortzea, arautu barik zegoen egoera bat erregularizatzea baino", azaldu dute.
Beraz, ordenantza indarrean ipintzen denetik aurrera, zehaztuta geratuko dira taberna bakoitzak ipiniko dituen mahai eta aulkien kopurua, euren kokalekua, oinezkoentzat libre utzi beharko dituzten pasabideak eta baita zerbitzua eskaini ahal izateko urtero ordaindu beharko den zenbatekoa ere, besteak beste.