Jaurlaritzak Euskadiko Hidrokarburoak (SHESA) erakunde publikoari eman zizkion baimenak. Euskal Energiaren Erakundeak sortutako erakunde honek EAEko energia hornidura dibertsifikatzen laguntzea du helburu. Lurrazpian dauden hidrokarburoak dira SHESAren jarduera eremu bat. Ildo horretatik, hainbat eremu ikertzeko 2011n egindako eskaeren erantzuna da iazko urrian jaso zuena. Eremu horiek Landare, Lore eta Sustraia deitzen dira eta Mañaria Lore esparruaren barruan dago, Durangaldeko beste herri batzuekin batera. Horren aurrean, aho batez onartutako mozioaren bidez, udaleko alderdi biek "kezka" adierazi dute baimenak udalerrira ekarri ditzakeen ondorioak direla-eta. Mañarian mota horretako ikerketak "geratzeko" eskatzen diete SHESAri, Euskal Energiaren Erakundeari zein Jaurlaritzari. Aldi berean, ikerketa mota horietara barik, energia berriztagarriak indartzeko proiektuetara bideratutako diru-laguntzak "handitzeko" eskatzen dute.
Egoera bere osotasunean hartuta, baimen berriekin Euskal Autonomia Erkidegoko azaleraren "%50 baino gehiago" geratzen da hidrokarburoak ikertzeko baimenen eraginpean, onartutako mozioak jasotzen duenez.