Txahal okela ekologikoaren postua nobedadea izango da domekako azokan

Joseba Derteano 2018ko mai. 18a, 11:30

Mañariko elikadura eta landare azokak 23. aldia egingo du domekan. 10:00etan hasita, 20 postu jarriko dituzte guztira plazan, eta horietatik bi lehenengoz etorriko dira: hutsean enbasatutako txahal okela ekologikoarena eta gildena. Zornotzako eta Mungiako ekoizleak dira, hurrenez hurren.

Horiekin batera, ezti, txakolin, sagardo, gozogintza, ortuari eta beste hainbat produkturen gaineko postuak ere egongo dira.

Pilotalekuan artisautzari buruzko tailerrak egingo dituzte goizean zehar. 12:00etan Andra Mari dantza taldearen saioa egongo da,  hau ere pilotalekuan. Plazan 20 antxume parrillan erre eta pintxotan salduko dituzte, baserriko ogiagaz batera, euro bitan.

Aurten, hirugarrengoz, ahuntz azpigorrien txapelketa ere egingo dute. Bizkaiko, Gipuzkoako eta Arabako 13 artzainen ahuntzak ikusi ahal izango dira, plazaren ondoko aparkalekuan.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!