"Amestutako une bat izan da; baita liberazio moduko bat ere"

Joseba Derteano 2018ko mai. 15a, 12:45
Argazkia: Photo Gomez Sport

Mikel Bizkarra mañariarrak profesionaletako lehenengo garaipena lortu zuen joan zen asteburuan Aragoiko Itzuliko azken etapan. Poza eta lasaitasuna, sentsazio biak uztartu zitzaizkion garaipenean.

"Amestutako momentu bat izan da eta oso pozik nago. Liberazio moduko bat ere izan da. Irabazten badakigula erakutsi dugu", adierazi du Euskadi Murias taldeko txirrindulariak.

Lehen Mailako Cerler mendate gainean amaitutako etapan eraso bi jo zituen. Lehenengoan harrapatu egin zuten, baina helmugatik kilometro eta erdira jotako bigarrenean, ez. Etapa garaipena ez ezik, mendiko sailkapena ere berarentzat izan zen.

Orain, atseden hartuko du. Ekainaren 14tik 17ra Frantziako Pirinioetan izango den Rouet du Sud itzulia izango du denboraldiko hurrengo hitzordua.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!