anboto.org

Pintxo lehiaketa egingo dute lehen aldiz, herriko gazteekin elkarlanean

  Gizartea  Mañaria

Aurtengo jaietako nobedade nagusia lehenengo pintxo lehiaketa izango da. Gazte lokalean ibiltzen diren gazteekin elkarlanean antolatu dute jai batzordekoek, eta abuztuaren 14rako ipini dute zita. Herritarrek sukaldari sena atera eta elkarregaz gastronomiaz disfrutatzeko aukera bat izango da.

Antolatzaileek herriko tabernetan utziko dituzte lehiaketan apuntatzeko paperak, egunaren aurretik. Banaka edo taldeka parte hartu ahalko da, eta norberak aukeratutako pintxoa plazan bertan egin beharko da 14an, jendaurrean. Gero, epaile batek erabakiko du zein den Mañariko pintxorik onena. “Jai-giroan zerbait polita egin eta gero, elkarregaz afaltzea da asmoa”, jai batzordekoek esan dutenez.

Pintxo lehiaketarena ez da gazteekin elkarlanean antolatutako ekintza bakarra. Izan ere, jaien azken egunean talentu lehiaketa egingo dute, herritarren artista dohainak jendaurrean erakusteko.

Mozorro udatiarra
Bestalde, Mozorro Eguneko gaia Udaz blai izango da. Beraz, mañariarrak hondartzara, txiringitora edota oporretara joango bailiran jantziko dira. Mozorrorik onenak saria edukiko du, eta txosnak txiringito eran dekoratuko dituzte.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa