Mallabiko Udalak bat egin du Zaporeak elkarteak antolatutako janari bilketa solidarioagaz. Udaletik jakitera eman dutenez, Zaporeak elkarteak bultzatzen duen Lesbos proiektuak Greziako uhartean dauden errefuxiatuei elikadura egokia eskaintzea da asmoa.
Hori horrela, barikura bitartean, martxoak 28, Mallabian makarroiak batuko dituzte; hodi formako makarroiak izango dira. Bi bilketa gune jarriko dira, bata eskolan eta bestea udaletxean bertan.
Kanpainari amaiera martxoaren 29an emango diote, Ermuan 'Tupper Solidarioa' ekimenarekin. Bertaratzen direnek prestatutako janari-tupper bat erosi ahal izango dute bost euroren truke.