Bertso saioa Mallabian, ekimenez beteriko beste asteburu bati ekiteko

'Durangaldea uztabarritzen' ekimenaren barruan, Iruri Altzerreka, Paulo Salterain, Unai Iturriaga, Ander Gerrikaetxebarria eta Onintza Enbeita arituko dira bertsotan Mallabiko anfiteatroan bertsozaleen aurrean.

Durangaldeko Bertso Eskolak antolaturiko 'Durangaldea uztabarritzen' bertso zirkuitua Mallabira helduko da zapatuan. Bost bertsolari igoko dira Parkeko anfiteatrora: Iruri Altzerreka, Paulo Salterain, Unai Iturriaga, Ander Gerrikaetxebarria eta Onintza Enbeita. Eider Gallastegi arituko da gai-jartzaile lanetan. Ekimena 18:00etan hasiko da eta edukiera 60 lagunetara mugatuko dute. Mallabikoaren ondoren, beste saio bi geratuko dira zirkuitua amaitzeko: Abadiñon uztailaren 2an, eta Durangon uztailaren 10ean.

Bestalde, domekan Arantza eta Pantxo taldeak kontzertua eskainiko du pilotalekuan, 12:30ean. Arratsaldean, haurrentzako paintball saioak egingo dituzte toki berean.

Astean zehar, beste hainbat ekimen egongo da. Besteak beste, Aritz Ganboa Arruazuko artzainaren Bideak dokumentala eskainiko dute eguenean, Kontzejuzarrean. Emanaldi bi egongo dira: 17:30ean eta 19:30ean.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.