Baldintza orrian zehazten dira zer zerbitzu mota eskaini daitezkeen bertan. Nagusiki, udalerriak ez dituen zerbitzuetara eta herriari onura eskainiko dioten negoziora bideratu gura dute: elikagaien salmentara eta, orokorrean, etxeko gaien salmentara bideratutako merkataritza; papertegi negozioak (prentsa salmenta, liburuak, kopia-denda, eskolako material-denda...), eta osasun zientziak (fisioterapia, podologia, elikadura…).
Ekintzaileei bideratutako lokala osasun zentroaren ondoan dago eta 34 metro karratu inguru ditu. Lokalak elektrizitate hartunea eta ur hornidura ditu, eta baita komun irisgarri bat ere, 50 litroko edukiera duen termokoa.
Azaroaren 25era arte
Dagoeneko hasita dago proposamenak aurkezteko epea, eta azaroaren 25era arte iraungo du. Lokala alokairuan hartu ahal izateko baldintzak jasotzen dituen dokumentua Bizkaiko Aldizkari Ofizialean edo udaleko webgunean eskuratu daiteke. Lokala errentan hartzeko ematen den eskubideak bost urteko epea izango du kontratua esleitzen denetik zenbatzen hasita. Esleipendunak eskatuz gero, Mallabiko Udalak luzatu egin dezake ondasuna ustiatu ahal izateko kontratua.