Bariku iluntzean Biharko Izarrak pilota txapelketako finalak jokatu zituzten. Binakako finala ikusgarria izan zen eta Jokin Altunak (Amezketa, 18 urte) eta Xabier Urruzolak (Asteasu, 24 urte) partidu gogor baten ostean lortu zuten txapela Xabier Santxoren (Usurbil, 23 urte) eta Aitor Irustaren (Munitibar, 21 urte) kontra: 22-17. Atzelari biak maila handian ibili ziren, baina Altuna izan zen partiduko izarra; 18 urtegaz etorkizun oparoa izan dezakeela erakutsi zuen eta berari eman zioten pilotaririk onenaren saria. Santxok ez zuen bere egunik onena izan. Irabazle biek Aspe pilota enpresagaz profesionaletan debuta egingo dute laster.
Lau t’erdian Joanes Bakaikoak uste baino errazago menderatu zuen Eneko Labaka: 22-11. Bakaikoak kaiolan jokatzeko dohai aproposak dituela erakutsi zuen eta dotore mugitu zuen pilota. Labaka zorte handi barik ibili zen.