Euskal preso eta iheslari politikoen eskubideek ere ez dute hesirik merezi, eta horiexen alde ere egingo dugu korrika Lasterbidean ekimenaren hamargarren edizioan. Aurten, gainera, gure eskualdean egingo da lasterketa, Abadiñon, ekainaren 14an eta 15ean.
Urtero emakumeon eskubideen alde ere egiten dugu korrika. Lilakrosean (Martxoak 8) eta Emakumeen Lasterketan (Azaroak 25), eta tinko jarraituko dugu geure erreibindikazioekin.
Azken urteetan beste hainbat lasterketa ere sortu da, jendartean kontzientzia eta sentsibilizazioa pizteko, eta erronka sozialei aurre egiteko. Hortxe daude gaixotasun arraroen aurkako lasterketak, ELAren kontrakoak, haur minbiziaren kontrakoak… eta, aldi berean, pertsonaren duintasunaren aldekoak.
Amaitzeko, mendi lasterketa solidario bat aipatu gura nuke: Gamiz-Fikako Burdin Hesiko Lasterketa. Proba honek kultura, memoria historikoa, kirola eta natura batzen ditu, baina batez ere lasterketa solidarioa da. Bertan batzen duten dirua Ezkerraldea-Gurutzeta ESIari emango diote, minbizi eta gaixotasun kronikoen kasuetan laguntza pediatrikoaren arreta humanizatzeko. Lasterketa ekainaren 22an da eta hantxe izango gara.