09:00etan puntuan eman zitzaion hasiera lasterketari, eta 500 bat korrikalari abiatu ginen, plazan batu zen jendetzaren txalo artean. Zirraragarria!
Otzaurte da lehen puntu “beroa”, ehunka zale oihuka eta txaloka animatzen daudena. Hortik aurrera, lasaitzen joan ziren barruak eta lasterketan bete-betean sartu nintzen. Fresko jarraitzen zuen eguraldiak eta zorua ezin hobeto zegoen korrika egiteko.
Lasterketa erdi inguruan, Sancti Spiritu, indarberritzeko gune garrantzitsua Aizkorrira bideko aldapei ekin aurretik. Niretzat indargunerik handiena lasterketa ahaztezina egiteko, han baitzeuden Alluitz (semea) eta Mikel. Patxo handi bana eman eta, aurrera amatxo!
Aizkorri gaina ere jendez gainezka. Oilo-larrua! Gailurreria atzean utzita, Urbia geneukan itxaroten Andraitz igo aurretik.
Inoizko denborarik onena eginez heldu nintzen Zegamako helmugara, irribarretsu. Eta ez nintzen bakarra izan, lasterketako errekorra hautsi baitzuten Stian Angermundek (mutiletan) eta Maite Maiorak (nesketan). Zorionak!