Conchita Astola hautatu genuen presidenta, eta estatutuak bidali genituen, legeriak agintzen zuen legez. Gobernadoreak urtebete beranduago, ekainaren 1ean, onartu zigun elkartea. Baina, itxoiten egon gabe, urietan pintura erakusketak eratu genituen, eta denontzat, guretzat, agintarientzat, euskal kulturarentzat eta, oro har, euskal gizartearentzat sorpresa bat izango zena, Euskal Liburu eta Disko Azoka ere antolatu genuen. Ideia sortzaileetariko batena izan zen, Leopoldo Zugazarena, nonbait Errepublika garaitik hartua. Arrakasta izugarria izan zen eta, gaur egun, elkartearen ezaugarririk ezagunena da, batez ere, Euskal Herria mailan.
Baina elkarteak ez du 1965eko oroimenean gelditu behar, baizik eta aztertu eta baloratu egin behar du zer izan den eta zer egin duen 50 urte hauetan Conchita Astola eta bere taldeak, orobat Balendin Lasuenek, Jose Ignazio Alberdik, Anton Mari Aldekoa-Otalorak eta Nerea Mujikak eta bere zuzendaritza kideek eta bazkide guztiek. Eta aurrera begiratuz, eskualdearen mesedetan.