Xaboia

Fideltasuna, edo fideltasuna eza, nahiko kapritxosoa izaten da batzuetan. Eta ez naiz kontu erromantikoez ari. Arropa garbigailu bat erosi izan dudanetan egin izan dut  “hausnarketa” hori,  gogora etortzen zaidalako  amak erosi zuen lehen “Labadora automatikoa”. Danborraren barruan marka ezagun bateko xaboi paketetxo bat zekarren opari. Aparatu zaharrean erabiltzen zituen xaboi eskama usainbakoetara ohituta, progresoaren usaina-edo, ez dakit nik, iritzi nion automatikaren xaboi usain gozo berri hari.  Gero amak, hura garestiegia zela eta, beste marka bat erosten bazuen ere, nik ez dut sekula ahaztu lehen usain hura.


Eta zelan diren gauzak, neure etxerako ze xaboi erosi  erabaki behar izan nuenean ez nuen zalantzarik izan. Lehen usain hura gura nuen nik. Harrez geroztik ez dut markaz aldatu. Kuriosoa da zelan lor litekeen marka batekiko fideltasuna pakete ziztrin batekin.

Jendearekin ere berdin gertatzen dela uste dut. Nik neuk beti estimatu izango ditut pertsona batzuk noizbait  keinu politen bat euki izan dutelako nirekin. Berdin dio gero adiskideak izan ez bagara ere, ez ditut sekula ahaztuko, euren alde egingo dut beti. Kontrara ere gertatu izan zait, ostera, egia esateko. Ederra litzateke, baina,  besteek ere norbera horrela gogoratzea, xaboi paketetxo bat legez.

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.