Izan ere, musika estilo zehatz baten inguruan hainbat gazte taldek arrakasta izan dute urteotan, gazte topagune guztietan joz, gaztetxeetako programazio handienetan agertuz zein aretoak betez. Arazoa dut talde horiekin, askok abestietan botatzen dituzten letrak oso errepikakorrak direlako (melodiez ez dut berbarik egingo…). Ezagun bati entzun nion jolas bat zeukatela kuadrillan: aipatzen zuten berba errepikakor jakin bakoitzeko, trago bat hartzen zutela. Mozkor itzela hartuko zuten jolasagaz!
Ez da posible jendetza baten aurrean aldarri kutsudun betiko lau berba etengabe abestuz eragitea. Barkatu, baina hori ez da mezu bat zabaltzea. Badaude manera asko askatasuna, elkartasuna eta Euskal Herrian hizpide historikoak izan diren gaiei eusteko. Baina betiko berbak behin eta berriro erabiliz gero, abesti batek dioen legez, berbak itxuraldatzen dira, esanahia ahazten eta zentzua galtzen dute. Haize berria opa dut, musikan zein estilo horren baitako sorkuntzan.